Қазақстан Республикасының Тұңғыш Президенті, Елбасы Н.Ә.Назарбаевтың «Ұлы даланың жеті қыры» мақаласында алға қойған міндеттерін жүзеге асыру бойынша «Туған жер тұлғалары» ақпараттық жобасы аясында Балқаш қаласының мемлекеттік архиві М.Хамзин атындағы мәдениет сарайында көрнекті әдебиеттанушы, ғалым, филология ғылымдарының докторы, профессор Қазақстан Республикасы Гуманитарлық ғылымдар Академиясының және Айтматов академиясының академигі Бақытжан Қауасханұлы Майтановтың жеке қорының тұсаукесерін өткізді.

Тұсаукесерге Қарағанды облысының мәдениет, архивтер және құжаттама басқармасы басшысының орынбасары Е.М.Нелдібаев, архивтік қызмет бөлімінің басшысы Г.К.Айсанова, қорқұрушының зайыбы М.К.Майтанова, ұстаздары, достары, туыстары сонымен қатар қаланың мектептерінің қазақ тілін оқытушылары қатысты. Тұсаукесер барысында архив қорына шолу жасалды, зайыбы М.К.Майтанова мен туыстарының, достарының, мұғалімдердің, естеліктерімен толықты.

С.Сейфуллин атындағы № 7 мектеп-гимназия оқушылары, «Абай оқулары» қалалық байқауы лауреаттарының оқылымы шара қатысушыларының көңілін қорқұрушының құжаттық мұрасының елеулі бөлігін арнаған Ұлы Абай поэзиясының әлеміне аударды. Іс-шараға қатысушылардың назарына «Есімі қала тарихында» құжаттар және фотоқұжаттар көрмесі ұсынылды, онда ғалым Б.Қ.Майтановтың өмірбаяны, шығармашылық қызметі, отандық әдебиеттанудың дамуына қосқан үлесі көрінді.